Член 1

Со овој правилник се утврдуваат основните правила на однесување на вработените, учениците, родителите и трети лица.

Член 2

Со почитување на правилата се обезбедува: успешно одвивање на воспитно-образовната работа; подобрување на работната дисциплина; безбедност во училиштето и заштита на училишниот имот.

Член 3

Во училиштето се изградуваат и развиваат меѓусебни односи на разбирање и почитување.

Член 4

Во училиштето не се дозволени активности со кои се загрозуваат, омаловажуваат или дискриминираат поединци или групи по било каков основ.

Член 5

Ученикот има право да ја посетува наставата и да учествува во воспитно-образовната работа во училиштето.

Член 6

Ученикот има обврска редовно да ја посетува наставата и да ги исполнува планираните обврски и задачи што се предвидени со наставниот план.

Член 7

Забрането е телесно и психичко малтретирање на ученикот.

Член 8

За учениците кои ги прекршуваат правилата на воспитно-образовната работа се применуваат педагошки мерки што се утврдени со Законот за основно образование (чл. 72).

Член 9

Учениците се пофалуваат и наградуваат на начин утврден со Законот за основно образование (чл. 75).

Член 10

Вработените имаат обврска со својата работа, однесување и изглед да придонесуваат за угледот на Институцијата — ОУ.

Член 11

• вработените имаат обврска да се грижат за остварување и почитување на правата, обврските и одговорностите на учениците;
• наставникот е одговорен за работната атмосфера, дисциплината и безбедноста на учениците на часот;
• секој училишен проблем наставниците треба да го решаваат навремено, конструктивно и постапно (наставник — ученик; наставник — ученик — одделенски раководител; наставник — ученик — родител; наставник — ученик — стручна служба);
• одделенскиот раководител е должен да биде во постојана комуникација со родителот, навремено и конкретно да го информира, да бара ангажман и соработка во решавање на проблемите;
• не е дозволено наставникот да отстранува ученици од часот;
• наставникот има обврска да го прими на час ученикот кој доцни и истото да го евидентира;
• вработените имаат обврска редовно и на време да доаѓаат на работа;
• наставниците се должни да дојдат во училиште 30 минути пред почетокот на часот;
• за секое отсуство од работа или предвремено заминување, треба да биде известен директорот;
• вработените треба да доаѓаат на работа прикладно облечени, водејќи сметка дека со својот надворешен изглед придонесуваат за угледот на својата професија и воспитно делуваат на учениците;
• наставниците за време на часовите не треба да користат мобилен телефон;
• наставниците и стручните соработници се должни редовно и активно да се вклучуваат во работата на стручните органи на училиштето;
• непочитувањето на правилата од член 10 и член 11 од овој правилник ќе биде санкционирано согласно законската регулатива.

Член 12

• ученикот треба да дојде во училиште најмалку 10 минути пред почетокот на часот;
• ученикот кој задоцнил има обврска да влезе на часот и без да попречува да се вклучи во работата;
• за секое отсуство од часовите ученикот е должен навреме да го извести одделенскиот раководител (или предметниот наставник, стручната служба, директорот);
• ученикот не смее без одобрение од наставникот да го напушти часот;
• ученикот треба културно и коректно да се однесува кон другите ученици, наставниците и вработените во училиштето;
• ученикот треба да се воздржува од употреба на навредливи зборови, поттикнување и учество во тепачки;
• за решавање на проблемите во односот со другите ученици, наставниците или други лица, ученикот треба да побара помош од одделенскиот раководител, наставник, педагог, психолог или директорот;
• ученикот треба да биде прикладно облечен, да се грижи за личната хигиена и уредност;
• ученикот не смее да носи опасни предмети и средства кои може да ја загрозат безбедноста во училиштето (спрејови, петарди, камења, шипки, т.н. боксери, ножиња, запалки и други слични предмети);
• ученикот треба да се грижи за училишниот инвентар;
• на првиот час мобилните телефони се собираат во кутија која дежурниот ученик ја предава на домаќинот на училиштето. По завршување на часовите дежурниот ученик кутијата ја враќа во паралелката и секој ученик го зема својот мобилен телефон;
  • доколку ученикот има неодложна потреба за користење на телефонот, треба да го извести наставникот или одделенскиот раководител, кој ќе преземе активност за да му се овозможи истото;
  • доколку родителот има неодложна потреба да го контактира своето дете, треба да се јави на одделенскиот раководител, кој ќе преземе активност за да му се овозможи истото;
• по завршување на училишните активности и обврски ученикот треба мирно да замине од училиштето и училишниот двор.

Член 13

Секој е одговорен за своите материјални добра во училиштето (лични работи на вработените и учениците).

Член 14

Родителите на учениците и други надворешни лица имаат обврска да ги почитуваат правилата и другите општи акти на училиштето.

Член 15

Родителите и другите надворешни лица при влегување во училиштето имаат обврска да се пријават кај дежурното лице.

Член 16

Родителите на учениците и други надворешни лица треба да се однесуваат културно и коректно кон учениците и вработените во училиштето.

Член 17

• родителите треба редовно да се интересираат за учењето и однесувањето на своето дете;
• родителите треба да соработуваат со одделенскиот раководител и предметните наставници и редовно да доаѓаат на родителските средби;
• родителите треба училишните проблеми да ги решаваат низ директна и конструктивна комуникација исклучиво со одделенскиот раководител, наставниците, стручната служба и директорот. Не е дозволено родителите да се расправаат со соучениците на своето дете, како и со нивните родители.
• родителите се должни навремено да ги најавуваат и оправдуваат отсуствата на своето дете;
• родителите треба да го почитуваат временскиот распоред на часовите и да не влегуваат во училница за време на наставата;
• родителите се должни да го земат своето дете најдоцна до 17:00 часот, кога завршува дежурството на наставниците од одделенска настава;
• секоја намерно направена штета од страна на ученикот, родителот е должен да ја надомести.